2011 წლის გაზაფხულზე ფონდმა ,,ღია საზოგადოება საქართველომ” გამოაცხადა საგრანტო კონკურსი: “საზოგადოებრივ ცხოვრებაში ახალგაზრდობის მონაწილეობის ხელშეწყობა”. კონკურსის ფარგლებში დაფინანსდა ცხრა პროექტი. პროექტები ერთმანეთისგან განსხვავებულია, თუმცა ყველას ერთი მიზანი აერთიანებს, როგორიცაა სამოქალაქო საქმიანობაში ახალგაზრდობის ჩართვის ხელშეწყობა და ახალგაზრდების გავლენის გაძლიერება გადაწყვეტილებების მიღების პროცესში.
ერთერთი პროექტის ფარგლებში შეიქმნა ,,მოხალისეთა საინფორმაციო ცენტრი”, რომელსაც ახორციელებს სამოქალაქო საზოგადოების განვითარების კავშირი ,,ბორჯღალო”. პროექტის მიზანია, ახალგაზრდების ინფორმირებულობის დონის ამაღლება მოხალისეობის ინსტიტუტის შესახებ აჭარაში, ახალგაზრდების ჩართვა მოხალისეობრივ საქმიანობაში და კომუნიკაციის ეფექტური მექანიზმის შექმნა დაინტერესებულ ახალგაზრდებსა და ორგანიზაციებს შორის.
პროექტის ფარგლებში შეიქმნა ვებგვერდი www.VOLUNTEERING.ge, რომელიც საუკეთესო მისამართია მათთვის, ვისაც მოხალისეობის ინსტიტუტის შესახებ ინფორმაციის მიღება სურს. ვებგვერდზე განთავსებულია ინფორმაცია დაწყებული მოხალისეობის განმარტებით, დასრულებული ინფორმაციით მოხალისეთა სკოლის შესახებ. ვებგვერდის მეშვეობით მოქალაქეები, ასევე, ეცნობიან მოხალისეთა პირად გამოცდილებას და საინტერესო ისტორიებს. ერთერთი ბმულით გადავდივართ ბლოგების გვერდზე, სადაც განთავსებულია თემატური პოსტები.
