საქართველოს ევროპის სამეზობლო პოლიტიკის სამოქმედო გეგმის პრიორიტეტების 2007-2010 წლებში შესრულების შეფასება- ანგარიშის პრეზენტაცია ბრიუსელში

2011 წლის 6-10 თებერვალს ბრიუსელში ფონდმა “ღია საზოგადოება – საქართველომ” სამოქალაქო საზოგადოების მხარდაჭერის პროგრამის შიდა პროექტის “საქართველოს ევროპის სამეზობლო პოლიტიკის სამოქმედო გეგმის პრიორიტეტების 2007-2010 წლებში შესრულების შეფასება – სამოქალაქო საზოგადოების ხედვა” ფარგლებში მომზადებული 2010 წლის ანგარიში წარადგინა.

ბრიუსელში გამართულ შეხვედრას ფონდის, ასოციაციის “მწვანე ალტერნატივა” და საქართველოს ახალგაზრდა იურისტთა ასოციაციის, ევრაზიის პარტნიორობის ფონდის და საქართველოს სტრატეგიული და საერთაშორისო ურთიერთობების კვლევის ფონდის წარმომადგენლები ესწრებოდნენ.

ვიზიტის ფარგლებში გაიმართა შეხვედრები ევროპარლამენტის, ევროკომისიის, ევროკავშირის წევრი სახელმწიფოების მისიების და ბელგიაში საქართველოს საელჩოს წარმომადგენლებთან. გარდა ინდივიდუალური შეხვედრებისა, 8 თებერვალს ჩატარდა მრგვალი მაგიდა, რომელიც საქართველოს ევროპული ინტეგრაციის აქტუალურ საკითხებს შეეხებოდა. მრგვალი მაგიდის მონაწილეები, ძირითადად, ევროკავშირის წევრი სახელმწიფოების ბრიუსელში აკრედიტებული მისიების, ევროპარლამენტის და ევროპის საბჭოს წარმომადგენლები იყვნენ.

 ადვოკატირების ვიზიტის ფარგლებში განხილული საკითხები ფართო სპექტრს მოიცავდა. განსაკუთრებული ყურადღება დაეთმო შემდეგ საკითხებს:

1. 2010 წლის მნიშვნელოვანი მოვლენები და გამოკვეთილი პრობლემები: არჩევნები და საარჩევნო გარემო; თავისუფალი მედიის ფუნქციობის პირობები; გამოხატვის თავისუფლება; სოციალური უფლებები; და ა.შ.   
2. კონსტიტუციური ცვლილებები და ძალაუფლების დემოკრატიული განაწილება, მისი ასახვა ქვეყნის შემდგომ დემოკრატიზაციაზე.
3. საქართველოს ტერიტორიაზე იძულებით გადაადგილებულ პირთა განსახლების პოლიტიკა და პროცესი, ასევე მისი თანმდევი სოციალურ-პოლიტიკური ფონი.
4. მოლაპარაკებები ღრმა და ყოვლის მომცველი სავაჭრო ურთიერთობების თაობაზე: საქართველოს მთავრობის ეკონომიკური პოლიტიკის ვექტორის იდეოლოგიური განპირობებულობა და ევროპის სოციალურ-ეკონომიკური მოდელის ღირებულებებთან შესაბამისობა.
5. გარემოს დაცვა და მდგრადი განვითარება: მსხვილი ინფრასტრუქტურული პროექტების განვითარების გეგმები და მისი ასახვა საკუთრების უფლებებსა და ჯანსაღი ცხოვრების პირობებზე; პოლიტიკის განმაპირობებელი პრაგმატული და იდეოლოგიური ფონი.
6. სამოქალაქო საზოგადოების ხედვა ქვეყნის შემდგომი ევროპული განვითარების თაობაზე.

საქართველოს ევროპის სამეზობლო პოლიტიკის სამოქმედო გეგმის პრიორიტეტების შესრულების 2010 წლის ანგარიშის წარდგენის ფარგლებში შემდგარი მრგვალი მაგიდის შედეგები საინფორმაციო სააგენტო EUOBSERVER-მა გააშუქა.

საქართველოში ანგარიშის პრეზენტაცია მარტის თვეში იგეგმება.