2013 წლის 23 ოქტომბერს, საქართველოსა და სომხეთის ღია საზოგადოების ფონდებმა წარმოადგინეს ანგარიში, რომელშიც შეფასებულია ბოლო წლის მანძილზე ევროკავშირთან დაახლოების კუთხით გადადგმული ნაბიჯები და არსებული გამოწვევები.
ანგარიშში ყურადღება გამახვილებულია ‘აღმოსავლეთ პარტნიორობის საგზაო რუკით” გათვალისწინებული ვალდებულებების შესრულებაზე, რომელიც საქართველომ და სომხეთმა 2012 წლის მაისში მიიღეს. დოკუმენტი მოიცავს იმ რეფორმებს, რომელიც ორივე ქვეყნის მთავრობამ უნდა განახორციელოს 2013 წლის 28-29 ნოემბერს ვილნიუსში დაგეგმილ აღმოსავლეთ პარტნიორობის სამიტამდე.
მოცემულ ანგარიშში მკვლევარები აფასებენ საგზაო რუკით დადგენილი 
ვალდებულებების მხოლოდ პოლიტიკურ ნაწილს. საუბარია შვიდ ძირითად სფეროზე: მედიის თავისუფლება, არჩევნები, კორუფციის წინააღმდეგ ბრძოლა, კიბერუსაფრთხოება, საზღვრის მართვა და საგარეო პოლიტიკა, ადგილობრივი თვითმმართველობისა და სასამართლო რეფორმები. მონიტორინგის შედეგად, დოკუმენტით გაწერილი ვალდებულებების შესრულების დიდ ნაწილში პროგრესი შეინიშნება.
“მონიტორინგის შედეგების მიხედვით შეიძლება გავაკეთოთ დასკვნა, რომ საქართველო მზად არის ვილნიუსის სამიტისთვის და ევროკავშირთან ასოცირების ხელშეკრულების პარაფირებისთვის, მაგრამ ქვეყანაში ბევრი სერიოზული რეფორმაა განსახორციელებელი. მედიის თვალსაზრისით, შეიძლება ითქვას, რომ თავისუფლების ხარისხი გაიზარდა, თუმცა მედიის მიუკერძოებლობის საკითხი კვლავ აქტუალურია. სასამართლოს რაც შეეხება, გარკვეულწილად გაიზარდა სასამართლოს დამოუკიდებლობის ხარისხი, თუმცა ჯერ კიდევ პრობლემებია ფინანსური თვალსაზრისით. მთავარია, რომ არსებობს გზა პრობლემების მოგვარებისთვის, ანუ ეს იმას ნიშნავს, რომ ხელშეკრულების პარაფირებისთვის მზად ვართ, თუმცა ამის შემდეგ კვლავ გრძელი გზა გვექნება გასავლელი”- განაცხადა ხუციშვილმა.
არასამთავრობო ორგანიზაციებთან ერთად, კონფერენციას ესწრებოდნენ ალექსი პეტრიაშვილი, სახელმწიფო მინისტრი ევროპულ და
ევროატლანტიკურ სტრუქტურებში ინტეგრაციის საკითხებში, გუნარ ვიგანდი, ევროპის საგარეო ურთიერთობათა სამსახურის დირექტორი და ფილიპ დიმიტროვი, ევროკავშირის ელჩი საქართველოში.
ალექსი პეტრიაშვილის თქმით “ევროკავშირში ინტეგრაციას საქართველოსთვის ალტერნატივა არ აქვს. ვილნიუსის სამიტში მონაწილეობა არის დასაწყისი იმ დიდი გზის, რომელიც საბოლოო ჯამში მიგვიყვანს ევროპულ ოჯახში.”
ღონისძიებაში მონაწილეობდნენ მკვლევარები სომხეთიდან, რომლებმაც დეტალურად ისაუბრეს ევროინტეგრაციის კუთხით არსებულ იმ პრობლემებზე, რის წინაშეც სომხეთის რესპუბლიკა აღმოჩნდა.
მონიტორინგის შედეგები:
პროგრესი შეინიშნება მედიის თავისუფლების სფეროში. ყურადღება გამახვილებულია მედიაპლურალიზმზე, თუმცა აღნიშნულია ის გამოწვევები, რაც მიუკერძოებელ მედიას და სამომავლოდ დაგეგმილი ციფრულ მაუწყებლობაზე გადასვლას ეხება. გეგმის მიხედვით, ციფრულ მაუწყებლობაზე საქართველო უნდა გადავიდეს 2015 წლისთვის. არსებული მდგომარეობით თუ ვიმსჯელებთ, ეს პროცესი შეფერხებით მიმდინარეობს.
დოკუმენტში ასევე ხაზგასმით არის ასახული ის პროგრესი, რასაც ხელისუფლებამ მიაღწია საკანონმდებლო დონეზე ადგილობრივი თვითმმართველობის რეფორმასთან დაკავშირებით. თუმცა რეფორმის განხორციელებისას მნიშვნელოვანი იქნება ცენტრალურ და ადგილობრივ დონეებზე ხელისუფლებათა კონპეტენციების გამიჯვნა. ასევე ადგილობრივ დონეზე დასაქმებულ საჯარო მოხელეთა შესაძლებლობებისა და უნარ-ჩვევების განვითარება.
საზღვრის მართვის მხრივ აღნიშნულია ის წარმატება, რაც ინტეგრირებული საზღვრის მართვის სტრატეგიის განახლებას უკავშირდება, ასევე სასაზღვრო-გამშვები პუნქტების მოდერნიზება და ინფრასტრუქტურის განახლება. თუმცა მწვანე საზღვარზე არსებული ინფრასტრუქტურა ძალიან მძიმე მდგომარებაშია და საჭიროა საქართველოს ხელისუფლებამ მათ გასაუმჯობესებლად ქმედითი ნაბიჯები გადადგას. კვლავ პრობლემად რჩება დემარკაცია-დელიმიტაციის საკითხის მოგვარება მეზობელ სახელმწიფოებთან.
რაც შეეხება სასამართლო რეფორმას, დოკუმენტში ნათქვამია, რომ სასამართლოში კვლავ პრობლემად რჩება მისი ფინანსური დამოუკიდებლობა. ასევე, არაეფექტურია მოსამართლეთა დაწინაურების სისტემა.
რეკომენდაციები:
მკვლევარები თემების მიხედვით:
ანგარიში სრულად ხელმისაწვდომია ინგლისურ ენაზე.
ალექსი პეტრიაშვილის მიმართვა
გუნარ ვიგანდის მიმართვა
