სამოქალაქო საზოგადოების ფონდი მხარს უჭერს იმ დამოუკიდებელ და მრავალფეროვან ხმებსა თუ ინიციატივებს, რომლებიც საქართველოს ევროპულ მისწრაფებებს, ადამიანის უფლებებისა და მედიის თავისუფლების დაცვას, უმცირესობების საზოგადოებაში ინტეგრაციასა და სოციალური სამართლიანობის დამკვიდრებას ემსახურებიან.
ძლიერი სამოქალაქო საზოგადოება დემოკრატიული ცვლილებებისთვის
თითქმის 30 წელია, სამოქალაქო საზოგადოების ფონდის (ყოფილი ღია საზოგადოების ფონდის) გუნდი საქართველოს მოქალაქეების გაძლიერებისთვისა და განვითარებისთვის მუშაობს.
სამოქალაქო საზოგადოების ფონდი არის პლატფორმა, სადაც ადამიანები, ორგანიზაციები თუ კოალიციები დემოკრატიული ცვლილებებისთვისა და საზოგადოებრივი სიკეთისთვის ერთიანდებიან. სამოქალაქო სექტორისთვის, საინიციატივო ჯგუფებისთვისა თუ დემოკრატიული საზოგადოების მხარდამჭერი ადამიანებისთვის გაცემული საგრანტო დაფინანსებისა თუ ადვოკატირების მნიშვნელოვან კამპანიებში ჩართულობის შედეგად, სამოქალაქო საზოგადოების ფონდი მხარს უჭერს იმ დამოუკიდებელ და მრავალფეროვან ხმებსა თუ ინიციატივებს, რომლებიც საქართველოს ევროპულ მისწრაფებებს, ადამიანის უფლებებისა და მედიის თავისუფლების დაცვას, უმცირესობების საზოგადოებაში ინტეგრაციასა და სოციალური სამართლიანობის დამკვიდრებას ემსახურებიან. ფონდი საქმიანობს როგორც საქართველოს ევროპული მისწრაფებების მამოძრავებელი ძალა, რომელიც, სამოქალაქო საზოგადოებასთან ერთად, ფხიზლად დგას კორუფციის, ჩაგვრისა და ავტორიტარიზმის წინააღმდეგ.
თითქმის სამი ათწლეულის მანძილზე, ფონდის ინვესტიცია საქართველოში ღია და დემოკრატიული საზოგადოების განვითარებისთვის 118 მილიონ დოლარზე მეტია. ეს მხარდაჭერა ახალგაზრდების, ქალების, ბავშვების, ლტოლვილების, სტუდენტების, პროფესიული ჯგუფების, სოციალურად დაუცველების, ჯანმრთელობის პრობლემებისა თუ შეზღუდული შესაძლებლობის მქონე ადამიანების გაძლიერებისკენ იყო მიმართული.
სამოქალაქო საზოგადოების ფონდის გუნდმა მნიშვნელოვანი ცვლილებების განხორციელება შეძლო ახლადშექმნილი ორგანიზაციების, საინიციატივო ჯგუფებისა და აქტიური მოქალაქეების მხარდაჭერის, ადვოკატირების კამპანიების, საგანმანათლებლო ინიციატივების, პუბლიკაციებისა და სადისკუსიო სივრცეების წახალისების გზით.
ამბები ადამიანებზე, მრავალფეროვან საქმეებსა თუ ინიციატივებზე, რომლებიც დემოკრატიული ცვლილებებისთვისა და საზოგადოებრივი სიკეთისთვის ერთიანდებიან.
ჩვენი ამბები
სხვა ამბები
სამოქალაქო საზოგადოების ფონდი საქართველოს ღია საზოგადოების ფონდის საქმიანობის მემკვიდრეა. საქართველოს ღია საზოგადოების ფონდი 1994 წლიდან იყო ღია საზოგადოების ფონდების გლობალური ქსელის ნაწილი. აღნიშნულ გლობალურ ქსელში განხორციელებული სტრუქტურული, მენეჯერული, თუ გეოგრაფიული ცვლილებების პარალელურად, საქართველოს ღია საზოგადოების ფონდი სრულად ადგილობრივ ორგანიზაციად ჩამოყალიბდა და პრიორიტეტული საქმიანობა განახლებული სტატუსითა და სამოქალაქო საზოგადოების ფონდის სახელით განაგრძო. ფონდი, რომლის მისია და ღირებულებები უცვლელია, რჩება გლობალური ქსელის პარტნიორად რეგიონში.
სამოქალაქო საზოგადოების ფონდის მდგრადობას სრულად უჭერს მხარს ღია საზოგადოების ფონდების გლობალური ქსელი. ამასთან, ფონდი ახლაც წარმატებით ახორციელებს არაერთი საერთაშორისო ორგანიზაციის მიერ მხარდაჭერილ პროექტებს და ღიაა სხვა დონორებთან თანამშრომლობისთვისაც.
აღსანიშნავია ფონდის მნიშვნელოვანი როლი დემოკრატიული ცვლილებების თვალსაზრისით. ფონდი საზოგადოების გაძლიერებაზე ზრუნავდა ომის, სოციალური ძვრებისა თუ COVID-19 პანდემიის დროს. ფონდს დიდი წვლილი აქვს საზოგადოებრივი ჯანდაცვის ძირითადი რეფორმების წინსვლაში, მონაწილეობითი დემოკრატიისა და სამოქალაქო ჩართულობის ხელშეწყობაში, ადამიანის უფლებებისა და კანონის უზენაესობის დაცვასა და დამოუკიდებელი მედიის გაძლიერებაში.
მნიშვნელოვანი საქმეები ფონდის ისტორიიდან
პროგრამა მიზნად ისახავს საქართველოში ადამიანის უფლებების, თანასწორობისა და დემოკრატიის დაცვას, უფლებადამცველი ორგანიზაციებისა და აქტივისტების მხარდაჭერის, მათ შორის კომუნიკაციისა და თანამშრომლობის საერთო ნიადაგის შექმნის გზით. საქმიანობა ფარავს ისეთ მნიშვნელოვან საკითხებს, როგორიცაა შეკრებისა და გამოხატვის თავისუფლება, თანასწორობა და ა.შ.
პროგრამა ხელისუფლების ანგარიშვალდებულების გასაზრდელად მუშაობს. ეს საქმიანობა მოიცავს როგორც საქართველოს ევროპულ კავშირში გაწევრების მიმართულებით საქართველოს მოქალაქეების ინფორმირებულობის გაზრდას, ასევე ევროპული კავშირის წინაშე საქართველოს მიერ ნაკისრი ვალდებულებების შესრულების მონიტორინგსა და ანგარიშების მომზადებას.
პროგრამა მხარს უჭერს ონლაინ მედია ორგანიზაციებს დედაქალაქსა და რეგიონებში და აძლიერებს მედიის ადვოკატირების კოალიციას. ასევე, პროგრამა, პარტნიორებთან ერთად, მედიისა და გამოხატვის თავისუფლების ადვოკატირების კამპანიებს ახორციელებს.
პროგრამის მიზანია, ხელი შეუწყოს ეროვნული უმცირესობების უფლებების დაცვას, მათი შესაძლებლობების გაძლიერებასა და მათ მონაწილეობას საზოგადოებრივ-პოლიტიკურ ცხოვრებაში, საქართველოში ინკლუზიური საზოგადოების განვითარებისთვის.
